Það kom til mín kona í búðina (Handprjón) um daginn með svo svakalega fallega barnapeysu sem heillaði mig alveg uppúr skónum. Eftir að hafa hugsað um peysuna dag og nótt án þess að geta ýtt henni frá ákvað ég að fletta upp uppskriftinni og athuga hvort hún væri til í minni stærð. EN NEI…. hún var bara til í barnastærð… Ég ákvað samt að kaupa uppskriftina sem heitir Flower cardigan og skoða hana aðeins, verð enn æstari og ákveð bara að ná mér í aðeins grófara garn og stærri prjóna og þá hlyti hún að passa á mig. Madeline Tosh Vintage varð fyrir valinu sem er þvílík dásemd að ég get verið í peysunni yfir hlírabol þar sem hún er svo dásamlega mjúk. Ég fór pínu blint áfram þar sem ég var svo æst að ég gat ekki reiknað almennilega út stærðina út frá prjónfestu, heldur prjónaði ég bara stanslaust þar til hún var tilbúin. Þá fyrst gat ég mátað hana almennilega og hún smell passaði, mér til mjög mikillar gleði :).
Þetta var á sunnudaginn, ég skellti henni í þvott og lét hana þorna yfir nóttina á handklæði með 2 viftur flögrandi yfir henni til að flýta fyrir þurrkun.
Klæddist henni á mánudag og svo alla daga þar til núna rétt áðan að ég þvoði hana aftur og nú er hún komin aftur undir vifturnar svo ég geti notað hana áfram á morgun.
Ég er að sjálfsögðu byrjuð á annarri alveg eins peysu og mun setja inn framgang mála með hana :)…. Og hér er byrjunin…
Bless í bili… farin að prjóna áfram 🙂